அன்னை பூமியின் எண்ணை வளம் தீரப்போகிறது. இதை பீக்-ஆயில் க்ரைசிஸ், “எண்ணை உச்சவரம்பின் ஆபத்து” என்கிறார்கள். தொழிற்புரட்சியின் தாலாட்டில் மயங்கி அரைஞாணை அகற்றி டிஜிட்டல் வாட்ச் கட்டிக்கொண்ட மனித சமுதாயம் உபயோகிக்கும் அநேக பொருட்களும் அடிபடப்போகிறது. பெட்ரோல், டீசல், இவற்றை எரிபொருளாய் உபயோகிக்கும் கார், பஸ், விமானம், கப்பல் போன்ற வாகனங்களிலிருந்து, அங்காடித்தெருவில் மின்வெட்டிலும் கடைகள் ஒளிர வெளியே, சூழலில் கரும்புகை கக்கும் டீசல் ஜென்-ஸெட், எண்ணை மற்றும் இயற்கை வாயுவை எரிபொருளாக்கி மின்சாரம் உற்பத்தி செய்யும் நிலையங்கள், கச்சா எண்ணையின் உதிரி ரசாயன உபயோகங்களான பிளாஸ்டிக் பொருட்களில் தொடங்கி, வீடு கட்டும், ரோடு போடும் ஆஸ்ஃபால்ட், தார், மெழுகு என்ற பட்டியல் இருபது நிலவுகள் நகமெங்கும் ஒளிவிட ஏதும் நெயில் பாலிஷ் மற்றும் வாய்மை வரை நீள்கிறது. வாய்மை என்றால் லிப்ஸ்டிக் என்பதும் ஒரு அறிதல்.

எப்படி அறிகிறோம் என்பது கட்டுரையின் முதல் பகுதியில். நுண்கணிதம் (கால்குலஸ்) தவிர்த்து ஆனால் அறிவியலின் தீவிரத்தை குறைக்காத (ஆறாவதில் கற்ற) அல்ஜீப்ரா கணித மாதிரியைக் கொண்டு விளக்கிக் கொள்வோம். அடுத்து இதனால் உலகெங்கும் ஏற்பட்டுள்ள, ஏற்படப் போகும் இடர்களை ஓரளவு அலசுவோம். முற்பகுதி அறிவியல், பிற்பகுதி அவ்வறிவியலை மறைக்கும் அரசியல் செயல்பாடுகள்.

அப்ப வருங்காலம்? சுருக்கமாக, நோ பெட்ரோல். ஆனால் மாட்டுவண்டி திரும்பாது. அனிமல் ரைட்ஸ் பேச அநேகர் இருக்கின்றனர். கைவண்டியோ, குதிரைவண்டியோ மிஞ்சலாம். மேற்படி அனிமல் ரைட்ஸ் பேசும் முதல் உலக மாந்தர்கள் இவ்விரண்டையும் தொடர்ந்து ஆதரிப்பதால். நம்மவருக்கு கட்டுரையின் கடைசி வரியில் வழி சொல்லியிருக்கிறேன்.
Continue reading

மூக்கை வைத்து ஒருவர் என்ன செய்யலாம்? வாழ்கையில் சுவாசிக்கலாம். மெகாசீரியல் மாந்தராக இருந்தால், ஆண் பெண் வித்தியாசமின்றி, அழுது சிந்தலாம். எகிப்தின் கிளியோபாட்ராவாக இருந்தால், ரோமை ஆளலாம். அதே எகிப்தின் ஸ்பிங்ஸ்சாக இருந்தால், மூக்குடைந்த தன் சிங்க உடல் மனித முக உருவத்தை உலகின் அதிசயங்களில் ஒன்றாக தேர்வு செய்து உவகிக்கலாம். புலௌ புலௌ பொம்பா தீவில் வசிக்கும் பிரோபோசிஸ் குரங்காக இருந்தால், தன் மூக்கின் வடிவம் டின்டின் (tintin) காமிக்ஸ் வில்லன் ராஸ்டபாப்புலசுடன் ஒப்பிடப்படும் அவலத்தை அடைய நேரிடலாம். வானியல் அறிஞர் டைகோ பிராஹேவாக இருந்தால், பேச்சுவார்த்தை முற்றுகையில் மூக்கை கழட்டி பாலிஷ்செய்து எதிரியின் கவனத்தை கலைக்கலாம். அவருக்கு இளவயதில் கத்திச்சண்டையில் மூக்கு அறுபட்டு, பிறகு பொய் மூக்கு பொருத்தப்பட்டதாம். நம்ம தேவனின் துப்பறியும் சாம்புவாக இருந்தால், மூக்கை நீவிவிட்டுக்கொள்ளலாம். ஏதாவது துப்பு உதிக்கும். அநேகமாக தவறாக இருக்கும்.

மூக்கு வாய் இரண்டும் ஒருங்கே தன் பெரிய அலகில் கொண்டுள்ள டூகேன் பறவையாக இருந்தால்?

கட்டுரையே அதைப்பற்றித்தானே. டூகேன் பறவை பெரிய அலகை உபயோகித்தே தன் உடல் சூட்டை தணித்துக்கொள்கிறது. விவரிப்போம்.
Continue reading

உத்திரத்தில் ஆடும் ஹரிக்கேன் விளக்கு வெளிச்சத்திலும் பாட்டியின் அந்தக்கால நவரத்தின பெண்டண்ட்டில் மற்ற கற்களைக்காட்டிலும் வைடூர்யம் மட்டும் டாலடித்து ஜுவலிக்கிறதேன்? தோகை இளமயில் ஆடி வருகையில் வானில் மழைவராவிட்டாலும், தோகை நிறங்கள் அசாதாரணமாய் ஒளிருவதேன்? சாலையிலுள்ள மழைநீர்தேங்கிய குட்டைகளில் பெட்ரோல் டீஸல் ஒழுகிப் படர்ந்து, தாண்டிச்செல்கையில் நாம் பார்க்கும் கோணத்திற்கேற்ப பல நிறங்களில் தெரிவதேன்? கணினி மென்தகட்டை வெளிச்சத்தில் அப்டி இப்டி திருப்பினால் பல நிறங்களாய் தெரிவதேன்? அநேக வண்ணத்துபூச்சியின் இறகுகள் பளபளப்பதேன்?

பதில், இரிடெஸன்ஸ். அப்படியெனில் என்ன, அதற்கும் நேனொடெக்னாலஜிக்கும் என்ன சம்பந்தம். விவரிப்போம்.
Continue reading

மெத்தைமடி அத்தையடி என அதன்மீது காலின் மேல் காலை மடக்கிப்போட்டு மல்லாக்க விஸ்ராந்தி தீவிரமான “வீக்கெண்டில் ஒரு உலக இலக்கியம் சமைப்போமா” யோஜனையிலிருக்கையில், விட்டத்தில் செல்லும் பல்லியை கவனித்திருக்கிறீர்களா? அதுவும் நம்மை கவனித்தபடியே “ம்க்கும், இவனாவது இலக்கியமாவது” என்றபடி தலைகீழாய் விட்டத்தில் நகரும். நாம் கவனிப்பதை அறிந்து, உற்றுப்பார்த்து ஊர்ஜிதம் செய்து, சட்டென்று டியூப்லைட் சட்டம், மின்சார ஒயரிங் குழாய் என மறைவிடத்திற்கு பின் பதுங்கும். வேறெங்காவது பார்த்துவிட்டு மீண்டும் கடைக்கண்ணால் கவனித்தால், உண்டிவில்லிருந்து தயிர்பானைக்கு புறப்பட்ட கல்லாய், சடாரென்று ஜன்னல் கதவு, திரைச்சீலை பின்புறம், என அடுத்த மறைவிடத்திற்கு பயணிக்கும். தூரத்தில் நிகழும் (பல்லிக்கு நம்மைவிட உலகம் பெரிசுதானே?) நம் கண்சுழற்றல், கை விசிறல் போன்ற சிறு அங்க அசைவுகளையே கவனித்து உணருமளவிற்கா பல்லியின் கண்களும் மூளையும் செயல்படுகிறது? எனக்கு இது நீங்கா ஆச்சர்யம்.

அதேபோல் டொக் டொக் டொக் என பல்லி ஏன் சப்தமிடுகிறது? பரிணாம பாட்டன் முப்பாட்டன் வரையறுத்த பாட்டா, செம்மொழி கடந்த நுன்மொழியா, இல்லை ஹால் சுவற்றில் பூச்சிவகையறா டின்னரில் இருக்கும் சக பல்லிக்கு பெட்ரூமிலிருந்து ”சீக்ரமா சாப்டுட்டு வந்து படு” என்று ஜஸ்ட் “மோர்ஸ் கோட்” தகவல் தொடர்பா? அப்படியென்றால் ”டொக்” என்று பவ்யமான எரிச்சலுடன் ஒரேமுறை ஹாலில் உம் கொட்டுகிற பல்லிதான் அங்கேயும் ஆணா? இல்லை எனக்குத்தெரிந்த நம்பிகள் பலர் நம்புவதைப்போல, பல்லி சப்தமிடுவதே அச்செயலுக்கு சற்றுமுன் நம் மனதில் நினைத்ததை பலிதமாக்குவதற்குதானா? இந்த வீக்கெண்டாவது வீட்ல இருக்கர பல்லியெல்லாத்தயும் ஒழிச்சுகட்டனும் என்று நினைத்துக்கொண்டாலுமா?

பள்ளி விடுமுறையின் குழந்தைகளாய் இப்படி பல்லி பற்றியே நமக்கு பல கேள்விகள் இருக்கிறது. ஆதாரமான விந்தை ஒன்றிற்கு மட்டும் விடை இக்கட்டுரையில் காண விழைவோம். சுவற்றில் பல்லி எப்படி ஒட்டுகிறது? Continue reading

முன்னொரு காலத்தில் டயனோரா என்றொரு டிவி பிராண்ட் இருந்தது. விற்பதற்கு அங்கம் அவிழ ஆடையணிந்த அணங்கைகள் அக்கம்பக்கம் அதிர ”கீ……….ப் இன்ன்ன்ன்ன் டச்” என்று ஸ்டிரியோவில் விளம்பர ஸ்லோகம் விண்ணப்பிப்பார்கள். என்னுடன் தொடர்புகொண்டிரு என்று டிவி அன்று அரைகூவியது, மின்தொடர்புசாதனங்களின் செயல்பாட்டிற்கே இன்று இன்றியமையாத ஸ்லோகமாகிவிட்டது. கணினி சி.ஆர்.டி. திரையில் தொடங்கி, கியோஸ்க்களின் பில் போடும் மெஷின், சூதாட்ட ஸ்லாட் மெஷின்கள், வங்கி ஏ.டி.எம்.கள், பாம் பைலட், ஸ்மார்ட் ஃபோன் என அநேகமாக அனைத்து மின்திரைகளுமே இன்று தொடுதிரைகளாகிவிட்டது. ஐபாட், ஐஃபோன், ஐ.நா., ஐயா, என்று அனைவருமே சற்று அழுத்தினால்தான் கவனிக்கிறார்கள்.

நான்கு வெவ்வேறு தொழில்நுட்பங்களைகொண்ட தொடுதிரைகள் – டச் ஸ்க்ரீன் – மார்கெட்டில் உலவுகிறது. ரெஸிஸ்டிவ் டச், கப்பாஸிட்டிவ் டச், அக்கௌஸ்டிக் டச் மற்றும் இன்ஃப்ரா ரெட் டச்.
Continue reading

பணியில் பாஸ் கூறும் ஐடியாக்களை பரிசீலிக்கையில், மனையில் மனைவி செய்த புதிய பதார்த்தத்தை உண்டு உவேவக்கையில், பஸ்ஸில் வெகுஜன வாராந்திரிகளில் பளீரிடும் காரிகைகளை புரட்டுகையில், சட்டென கிரகிக்கக்கூடிய செய்திக்கோர்வையான சிறுகட்டுரையாக இன்றி, ஏன், எதற்கு, எப்படி, என்று ஒரே விஷ(ய)த்தை நீட்டிமுழக்கி முதுகுவலிக்கவைக்கும் தீவிர கட்டுரைகளை இணையத்தில் மேய்ந்து புக்மார்க்கையில், இப்படி நம் பல மேலோட்ட செயல்பாடுகளை-விளைவுகளை மேற்கோளிட, ”தாமரை இலைத் தண்ணீர் போல” என்பது நாமறிந்த வழக்கு.

காவிரி நாடன் திகிரிபோன்ற ஞாயிறின் ஒளிமழையில், பாண்டிய நெடுஞ்செழியனின் பட்டமகிஷியின் கால் சிலம்பினிற் சிதறிய முத்துக்களென, பொற்றாமரைகுளத்து தாமரை இலைகளில் திவலைகளாக நீர் திரண்டிருக்கும். வூட்டாண்ட இருக்கர கொலத்லயும் தாமர எலல இப்டிதான், தண்ணியே தேங்காது. தாமரை இலையை நீர் ஈரப்படுத்தாது. ஏனெனில், தாமரை இலை ஒரு மகா நீரொட்டா பரப்பு. சூப்பர் ஹைட்ரோஃபோபிக் ஸர்ஃபேஸ். கசியும் பேனாவின் பாக்கெட் மசி, கக்கத்து வியர்வையின் சட்டை ஈரம் போல, தாமரை இலைகளில் நீர் ஊறி சொதசொதப்புவதில்லை. ஆலிலை இப்படியில்லை. கிருஷ்ணரே உட்காரலாம் (சரி சரி, தாமரை இலையிலும் கிருஷ்ணர் உட்காரலாம்தான்; சண்டைக்கு வராதீங்க).

கிருஷ்ணரை குறிப்பிடுவதற்கு காரணம், கீதை எவன் கர்மயோகமாய் பலனில் பிரேமைகொள்ளாமல் செயல்களை ப்ரம்மத்திற்காக செய்கிறானோ அவனை, தாமரை இலையை எப்படி நீர் தீண்டுவதில்லையோ அப்படி பாவங்கள் தீண்டுவதில்லை என்கிறது (அத்யாயம் ஐந்து, சுலோகம் பத்து). தாமரை இலையின் மகா நீரொட்டா தன்மை இயற்கையின் புராதானமான ஒரு நானோடெக்னாலஜி வெளிப்பாடு.

சரி, தாமரை இலையில் எப்படி நேனொடெக்னாலஜி?
Continue reading

வைரஸ் நுண்ணுயிர்களின் எளிய செயல்பாடுகளையே கணிணிவகை பைனரி செய்திகளாய் பாவிக்கும் நேனோபாட் எனும் நுண்ணுடுருவிகளிலிருந்து, ஆட்டோவைவிட சற்றே பெரிதான ஊர்த்தியை நேனோ என்று பெயரிடும் அளவிற்கு நேனோ என்றதும் அறிவியலாளர்களுடன் நேனு நேனு என்று வர்த்தகவித்தகர்களும் கைகோர்க்கும் நேனோ டெக்னாலஜி என்கிற அறிவியல் துறை இன்று பிரபலம்.

இயற்கையை அறிதலுக்கு அறிவியல்சிந்தை ஒரு உகந்தவழி என்றால், அவ்வறிதலின் வெளிப்பாடான தொழில்நுட்பங்களுக்கும் இயற்கையே முன்னோடி. நேனோ டெக்னாலஜி விஷயத்திலும் இது உண்மையே. பல நேனோ பொருட்கள், டெக்னாலஜிகள், இயற்கையில் நம்முலக ஜீவராசிகளிடையே ஏற்கனவே படைப்பில், உபயோகத்தில் இருக்கிறது. சிலவற்றை எனக்குப்புரிந்த அறிவியல் எல்லைக்குள், இயற்கையின் நேனொடெக்னாலஜி என்கிற இளகிய பொதுத்தரப்பின் கீழ் வரும் சில கட்டுரைகளில் விளக்கமுற்படுகிறேன்.

இதன் முதல் பாகம் தாமரை இலையும், மகா நீரொட்டா பரப்புகளும் தலைப்பில் சொல்வனம் இணைய இதழில் வெளிவந்துள்ளது. படித்துப்பாருங்கள். இதே இதழில் ராமன் ராஜ குவாண்டம் மெக்கானிக்ஸ் பற்றி எழுதியுள்ள தெனாலிராமன் பூனையும், ச்ரோடிங்கர் பூனையும்!  கட்டுரையையும் படிக்காமல் விட்டுவிடாதீர்கள்.

என் கட்டுரையை மீள்பதிவாய் இங்கு பின்னர் வெளியிடுகிறேன். மற்றபடி, கட்டுரையின் வசனநடையும் கோமாளி உடையும், தீவிரத்தை உள்வாங்க ஏதுவாக்கும் குதூஹல மனநிலைக்கான பாவனைகளே. ஆங்கில nano தமிழில் நேனோவோ நானோவோ, நேனொ என்றே உச்சரிக்கப்போகிறேன். மைக்ரோ என்றால் ஏற்கனவே நுண் என்று பழக்கத்தில் உள்ளது (மைக்ராஸ்கோப் – நுண்னோக்கி). நேனோவை அப்படியே வைத்துக்கொண்டிருக்கிறேன். மைக்ரோ, நேனோ, பிகோ, ஃபெம்ட்டோ, அட்டோ போன்ற வார்த்தைகளை, சைக்கிள், பெடல் பிரேக், (குடிக்கும்)காபி என்பதுபோல அப்படியே புழக்கத்திற்கு கொண்டுவந்து உபயோகித்தாலும், விளக்கங்கள் கொடுத்தால் போதுமானது என்ற கருத்தில். இதற்கெல்லாம் கோபித்துக்கொண்டு, நீனு ”நேனொ”ன்னா நேனு ”நோநோ” என்று படிக்காமல்போய்விடாதீர்கள்.

அன்றே சாலமன் சொன்னார், எண்ணையில்லாமல் திரியில்லாமல் விளக்குகள் தலைகீழாக தொங்குமென்று. இது சுமார் முப்பது வருடம் முன்னர் பட்டினத்தில் பூதம் திரைப்படத்தில், விட்டத்தில் தொங்கும் மின்சார சாண்டிலியர் விளக்குகளை வியந்து பூதமாய் அசோகன் வசனித்தது.

எண்ணையின்றி, மின்சாரமின்றி வீட்டு விளக்குகள் எரியுமா?

எளிய தொழில்நுட்பத்தில் தண்ணீர் பாட்டில் சூரிய விளக்குகள் செய்திருக்கிறார்கள். சில வருடங்கள் முன், நல்ல வெய்யில், ஒரு மின்வெட்டு நாளில் பிரேஸில் பொறியியலாளருக்கு, எதேர்சையான வியர்வையில் தோன்றிய கண்டுபிடிப்பு. அருகில் படம்.

சகாய விலையில், சூழல் சிநேகமான, எளிதில் புதுப்பிக்ககூடிய, பகலில் வீட்டினுள் 55 வாட்ஸ் வரை வெளிச்சம் தரக்கூடிய, ஃப்யூஸ் போகாத, விளக்கு.

செயல்முறை எளிமையானது. பார்ப்போமா.
Continue reading

2011திற்கான வேதியியல் நோபல் பரிசு இஸ்ரேல் நாட்டு பேராசிரியர் டேனியல் ஷெக்ட்மேன் (Daniel Shechtman) குவாஸி-க்ரிஸ்டல்ஸ் அல்லது குவாஸி-பீரியாடிக் க்ரிஸ்டல்ஸ், பகுதி வெளிச்சீர் படிகம், என்ற விந்தை பொருளை கண்டுபிடித்ததற்காக கொடுக்கப்பட்டுள்ளது.

இப்பொருளையும் அதன் கண்டுபிடிப்பின் தாக்கத்தையும் புரிந்துகொள்ள சாதா படிகங்களை அறிமுகப்படுத்திக்கொள்வோம்.
Continue reading

பந்தை தூக்கிப்போட்டு காட்ச் பிடிக்க காத்திருக்கையில் பந்து கீழே விழாமல் மேல்நோக்கியே சென்றுகொண்டிருந்தால் பேஜாராகிவிடமாட்டீர்கள்? இப்படி ஒரு நிகழ்வையே 1998இல் நம் அண்டத்திற்கே ஒட்டுமொத்தமாய் நிகழ்வதாய், 2011 இயற்பியலுக்காக நேற்று நோபல் பரிசு வென்றுள்ள விஞ்ஞானிகள் 1998இல் கண்டுபிடித்தார்கள்.

வென்றவர் மூவர். சௌல் பெர்ல்முட்டர், அமெரிக்க லாரன்ஸ்-பெர்க்லி நேஷனல் லபாரட்டரியின் சூப்பர்நோவா காஸ்மாலஜி பிராஜெக்ட்டின் தலைவர் மற்றும் கலிஃபோர்னியா பல்கலைகழகத்தின் அஸ்ட்ரோபிஸிக்ஸ் பேராசிரியர். பிரையன் ஷ்மிட், ஹை-ஸீ சூப்பர்நோவா ஸெர்ச் டீமின் தலைவர்; ஆஸ்திரேலியன் நேஷனல் பல்கலைகழகத்தின் பேராசிரியர். ஆடம் ரெய்ஸ் ஜான் ஹாப்கின்ஸ் பல்கலைகழகத்தின் மற்றும் ஸ்பேஸ் டெலஸ்கோப் சயின்ஸ் இன்ஸ்டிட்யூட்டின் இயற்பியல் பேராசிரியர். ஹை-சீ சூப்பர்நோவா ஸெர்ச் டீமில் முக்கிய பங்கு வகித்தவர்.

எதற்காக பரிசு என்பதை கட்டுரையாக்குவோம்.

ஒற்றைவரியில், விரியும் அண்டத்தின் முடுக்கம் (ஆக்ஸிலரேஷன்) அதிகரிப்பதை தொலைதூர சூப்பர்நோவாக்களின் ஒளிவீரியம் மங்கலாவதை வைத்து நிர்ணயித்ததால், அதன் மூலம் அண்டத்தின் வாழ்கைபயணம் எதிர்காலத்தில் எவ்வாறிருக்கும் என்ற காஸ்மாலஜியின் அனுமானங்களையே புரட்டிப்போட்டதால், நோபல்.

இனி விரிவாக.
Continue reading

ஏலியன்ஸ் – அந்நியர்கள், வேற்றுகிரகவாசிகள், வளி-அறிவு-ஜீவராசிகள் – பற்றி சென்றவருடம் நிறைய எழுதிவந்தோம். மீண்டும் தொடர்வோம். இங்கு ஏலியன்ஸ் டாப்பிக்கில் நம் அனைவருக்கும் எழும் ஆதார கேள்வி ஒன்றை விவாதிப்போம்.

உலகில் சாமான்யர் இதுவரை பார்த்திராத ஏலியன்ஸ், வளி-அறிவு-ஜீவராசிகளை இருப்பதாய் ஏன் நம்பலாம்? எந்தவிதத்திலும் எவ்வகை தேடலுக்கும் இதுவரை தென்படாத இவர்கள் இருப்பதாய் மட்டும் ஏன் நம்பவேண்டும்? அறிவியல் சிந்தைக்கே ஒவ்வாத செயலாய் படுகிறதே. அப்படிப் பார்த்தால் பேய் பிசாசு இருப்பதாய் நம்மில் பலர் நம்புகிறோமே. அதை மூட நம்பிக்கை என்று சாடும் அறிவியல் சிந்தை, ஏலியன்ஸ்களை மட்டும் ஏன் இருப்பதாய் நம்மை நம்பச்சொல்லவேண்டும்?
Continue reading

சொல்வனம் இதழில் வெளியாகியிருக்கும் கட்டுரையை ஒரு மினி அறிமுகத்துடன் இங்கு மீள்பதிவாக்குகிறேன். ஈஸிசேரில் சாய்ந்தபடி நாளைக்கு இந்நேரம் நாற்பது வயதாகிவிடுமே, இவ்வுலகில் தங்கும் அவகாசத்தில் அநேகமாக பாதி முடிந்துவிட்டதே, தாத்தா வீடு, ராமாயணம், குஞ்சாலாடு, ஸ்ரீதேவி, திருட்டு தம், கிட்டார், மீன் வறுவல், இயற்பியல் என்று எதையுமே நாம் நினைத்தவகையில் அனுபவிக்கமுடியவில்லையே என்று கண்விழித்து சொப்பனம் கண்டு சற்றே அசர, ஜான் லெனனின் கிரானீ கிளாஸஸுடன் சாக்பீஸ் தூள் பறக்க போர்டெல்லாம் ஈக்குவேஷனாக ரிச்சர்ட் ஃபெய்ன்மேன் வேஷத்தில் இயற்பியல் பாடம் நடத்திக்கொண்டிருக்கையில், டார்லிங் லஞ்ச் மறந்துட்டீங்களே என்று கையில் குஞ்சாலாடோடு வந்த ஸ்ரீதேவி காற்றில் கரைய, விழித்துக்கொண்டேன்.

ஏமாற்றத்தில் ஈஸிசேரில் வெகுண்டெழுந்து நெற்றிக்கண்ணை விரலால் அழுத்த, இதெற்கெல்லாம் காரணம் நீ இன்னமும் தமிழில் ஒரு அறிவியல் கட்டுரை எழுதாததே என்று ஞானோதயம். துயிலாத மடினியை தொப்புள் பட்டனில் அமுக்கி எழுப்பி, தட்டுத்தடுமாறி  தட்டெச்சி, யாரிடமும் ஸ்பெல்லிங் அர்த்தமெல்லாம் கேட்காமல் நானே என் சொந்த முயற்சியில், ஸ்ரீதேவி கிடைக்காத கடுப்பில், தெருநாயும் துயிலும் ஒரு ப்ரம்ம முகூர்த்தத்தில் எழுதியதே பின்வரும் கட்டுரை. இவ்வகை நடை உடை பாவனையில் அடிக்கடி எழுதமாட்டேன் என்று உத்திரவாதமளித்தால் படித்துவிடுவீர்கள்தானே?

அடுத்த பத்தி நெடிது. அனைத்து வாக்கியங்களும் கேள்விகள். ஒரு ஓய்வு நாளில், சாய்நாற்காலியில் கிடந்து, என்னைச் சுற்றி இயங்கும் ஊடகங்கள், பொருட்கள் சிந்தனைகளை வைத்து  பத்து நிமிடத்தில் என்னால் எழுப்பமுடிந்தவை (நேர்த்தியாக மடினியில் தட்டச்சுவதற்கு அரைமணிக்குமேல் பிடித்தது). எனது நல்வாழ்விற்கு பதில் தேவையான கேள்விகளின் தொகுப்பு. படித்துப்பாருங்களேன்.
Continue reading

ஃபெலிஸா உல்ஃப்-ஸைமன் மற்றும் விஞ்ஞானிகள் குழு கலிஃபோர்னியாவில் உள்ள மோனோ ஏரியின் சேற்றில் வாழும் நுண்ணுயிரை பரிசோதித்து, மரபணுவில் பாஸ்பரஸ் மூலப்பொருளுக்கு பதிலாக ஆர்ஸெனிக்கை உபயோகித்து அதனையே உட்கொள்ளும் நுண்ணுயிர் (பாக்டீரியம்) உலகில் உள்ளது என்று நிரூபித்திருந்ததை பற்றி ஆர்செனிக் நுண்ணுயிரும் விஷக்கன்னி மாலாவும் கட்டுரையில் விளக்கியிருந்தோம். அந்த கட்டுரையின் அறிவியலில் நமக்கு பொதுவாக ஏற்படும் சந்தேகங்களை சார்ந்து சில கேள்விகளுக்கான பதில்களை (அனைத்தும் விடைகள் இல்லை) இங்கு பார்ப்போம்.

Continue reading

கடற்கரை, பாஸ் என்ற பாஸ்கரன் அடுத்து சென்னைவாசிகள் கூடிக் கார்களுக்கிடையே கால்பதித்து கட்டௌட்டுகளுக்கிடையே ஊடாடி, செத்த மரங்களுக்கிடையே சித்தம் களிப்புற, இந்த வருடமும் ”புத்தகக் காட்சி” இரண்டு வாரங்களாக அமோகமாக நடந்தது. அன்றாடம் பகலில் கண் அசரும் இடத்தை விட்டு அகலாமல், முன்னே இருக்கும் மாயக்கண்ணாடியில் கூகுள்-எர்த் வழியாக தொடர் ஸூம்-ஷாட்டாய் க்ளிக்கிப் பார்க்கையில், இந்த புத்தகச் சந்தையில் நம் விஞ்ஞானப்புலவர் விளங்கமுடியாக்கவிஞர்நான் (அதான் பெயர்) குடும்ப சமேதராக வாயிலில் நிற்பதை காண்கிறோம்.

பாரதியார், விவேகானந்தர், ஷேக்ஸ்பியர், மற்றும் காரக்கடலை விற்கும் பாதைகள் என நாற்திசையிலும் புத்தகக்காட்சியினுள் பயணித்து, ஓபாமா, ஓஸாமா போன்றோர் எழுதியுள்ள பல நல்ல தமிழ் புத்தகங்களை வாங்கி வீட்டில் பதுக்குவதென மனதிற்கொண்டு, எண்சீர் கழிநெடிலடி ஆசிரியவிருத்தத்தில் வேற்றுநாட்டரசரின் இடைநிலை ஊழியரைப்புகழ்ந்தேற்றிய தன் விஞ்ஞானப்புலமைக்கு தக்க சன்மானமாகப் பெற்ற பொற்கழியில் காற்கழியோடு வந்திருக்கிறார் வி.மு.கவி.

வி.மு.கவியிடம் உள்ள காற்கழியின் பணம் என்னும் விஷயத்தை P என்று குறிப்போம். அவர் செல்ஃபோனில் உள்ள கடிகாரம் காட்டும் அவகாசத்தை, நேரத்தை t என்று குறிப்போம்.
Continue reading

மரபணுவில் பாஸ்பரஸ் மூலப்பொருளுக்கு பதிலாக உபயோகித்துகொள்ளும் அளவிற்கு, நமக்கு விஷமாகிய, ஆ ர்சனிக்கை உட்கொள்ளும் நுண்ணுயிர்கள் உலகில் உள்ளது என்று பரிசோதனையில் நிரூபித்திருக்கிறார்கள். சென்ற வாரம்தான் இந்த ஆராய்ச்சி கட்டுரை வெளியாகியுள்ளது.

ஃபெலிஸா உல்ஃப்-ஸைமன் மற்றும் அவருடைய விஞ்ஞானிகள் குழு அமேரிக்காவில் கலிஃபோர்னியாவில் உள்ள யோஸமைட் பூங்காவின் அருகில் இருக்கும் மோனோ ஏரியின் சேற்றில் வாழும் நுண்ணுயிரை பரிசோதித்து, அவைகளில் ஒரு நுண்ணுயிரால் இவ்வாறு ஆர்சனிக்கை உண்டு வாழமுடியும் என்று காட்டியுள்ளனர்.

படத்திலுள்ளது scanning electron microscopy டெக்னிக் மூலம் எடுக்கப்பட்ட ஆர்செனிக் உண்ணும் நுண்ணுயிர் கூட்டம். GFAJ-1 என்று குறிப்பிடப்படும் இந்த நுண்ணுயிர் சில மைக்ரோமீட்டர் பருமனே. இங்குள்ள முற்றுப்புள்ளி ஒரு மில்லிமீட்டர். மைக்ரோமீட்டர் அதில் ஆயிரத்தில் ஒரு பகுதி.

மாற்று உயிர் என்று நாம் ஏற்கனவே விரிவாக விளக்கிக்கொண்டுள்ளோம். சொல்வனம் இணைய இதழில் இதைப்பற்றிய தொடர் கட்டுரையின் முதல் பாகம் வெளியாகியுள்ளது. அங்கு அடுத்த பகுதிகளில் மேலும் இவற்றை விரித்துரைப்போம். இந்த கட்டுரையில் இப்போதைக்கு புதிய கண்டுபிடிப்பின் விஷயம் சூடு ஆறுவதற்குள் சில விளக்கங்கள் தருகிறேன்.
Continue reading

உயிர் என்றால் என்ன என்பது பற்றி சுருக்கமாக அறிந்தோம். மாற்று உயிர் என்றால் என்ன?

மாற்று உயிர் என்று பெயரிடப்பட்ட ஜீவராசிகள், நம்மைப்போன்ற உயிரினத்துலிருந்து மாறுபட்டு, ஆனால் மொத்தமாக வேறாக இல்லாத, நம் உயிர்தொகை தழைக்கும் உருளையின் (பூமி) நிழலாய், இயங்கும் ஒரு நிழல் உயிருருளை. பூமியிலேயே நிஜத்துடன் தழைக்கும் Shadow Biosphere என்கிறார்கள்.

இவை எப்படி இருக்கலாம்?

Continue reading

எங்கெங்கோ வேறு உயிர்களை, ஏலியன்ஸை, அந்நியர்களை, தேடிக்கொண்டிருக்கிறோம். இதற்கு முன், நம் உலகிலேயே நாம் அல்லாத உயிர்கள், மாற்று உயிர்கள் (alternate life), கொண்ட நிழல் உயிருருளை (shadow biosphere) தழைத்திருக்கலாமே என்று இன்று அறிவியல்ரீதியாய் உணருகிறோம். இடப்புற சுழற்சியுடைய சக்கரைகள் வலப்புறம் சுழற்சியுடைய அமினோ அமிலங்களிளாலான, கார்பன் ஆதார பொருளாக இல்லாமல் சிலிக்கன், ஜெர்மானியம் என்று ஆதார-மூலக்கூறுகளுடன், ஒரு நியூக்ளியஸ் தாண்டி இரண்டு நியூக்ளியஸ் கொண்ட உயிரணுவுடனான, இப்படி பல வகைகளில் மாற்று உயிர்களை அனுமானிக்கலாம்.

எப்படி என்று விளங்கிக்கொள்ள முதலில் சுருக்கமாக நம் போன்ற உயிர் எதாலானது என்று பார்ப்போம்.

நாம் வேதியியல் பாதி உயிரியல் மீதி என்று கடவுள் பாதி மிருகம் பாதியாய் கலந்து செய்த கலவை. இன்று ஹோமோஸேப்பியன்ஸ் என்று அறியப்படும் நம் மனிதகுலத்தின் மூதாதையரும், மனிதக்குரங்கின் மூதாதையினரும் ஒரே பொது ஆதி-மனித-குரங்கு-மூதாதையினரிடமிருந்து தோன்றியவர்கள். இந்த உயிரினங்களின் பரிணாம வளர்ச்சியின் புரிதலை (கொம்பேறித்தாவும்) குரங்கிலிருந்து பிறந்தவன் மனிதன் என்கிற சினிமா பாட்டில் விளக்கியுள்ளோம்.

Continue reading

1965 வாக்கில் அமேரிக்காவின் டெலாவேர் நகரில் உள்ள Hercules Inc. எனும் கம்பெனியில் கரிம வேதியியல் ஆராய்ச்சித்துறையின் அறிவியலாளர் ஒருவர், கரி-கரி சேர்க்கையை எளிமையாக நிகழ்த்துவதற்கான பரிசோதனைகளை நிகழ்த்துவதற்காக அருகிலிருந்த டெலாவேர் பல்கலைகழகத்தின் உதவியை நாடினார். வெற்றிகண்ட பரிசோதனைகளின் முடிவுகளை 1967ஆம் வருடம் கம்பெனியிலிருந்தபடியே ஆராய்ச்சி கட்டுரையைக்கி வெளியிட்டார். பிறகு டெலாவேர் பல்கலைகழகத்தின் வேதியியல் துறையில் பேராசிரியராக பணியாற்றத்துவங்கினார். ஏற்கனவே செய்திருந்த ஆராய்ச்சியினால் பெரிதாக பயன் ஒன்றும் புலப்படவில்லை. 1980முதல் ஆராய்ச்சி செய்ய பணம் பற்றாக்குறை. பணம் கேட்டு மையங்களுக்கு எழுதி அனுப்பிய அனைத்து ஆராய்ச்சி பிரேரணைகளும் ஊத்திக்கொண்டது. ஆராய்ச்சியை மேற்கொள்ளமுடியாமல், வெறும் ஆசிரியராக இருக்கப் பிரியப்படாமல், 1989ஆம் வருடம் இந்த அறிவியலாளர் ரிடையர் ஆகிவிட்டார். இன்றும் Emeritus Professor என்று பெயரளவில் பல்கலைகழகத்துடன் உறவு வைத்துக்கொண்டிருந்தாலும், ஃபுளோரிடாவில் ரிடையர்ட் வாழ்க்கையை ஜாலியாக கழித்துக்கொண்டிருக்கிறார்.

இவர்தான் 2010இன் வேதியியல் நோபல் பரிசுபெற்ற ரிச்சர்ட் ஹெக்.

2010 வேதியியல் நோபல் பரிசு, இவர் 1967ஆம் வருடம் நிகழ்திய பல்லேடியம் காட்டலிஸ்ட் உபயோகித்த கரி-கரி சேர்க்கை நிகழ்த்தும் வேதியியல் மாற்றத்திற்காக.

ஒரு ரசா(யன)பாசமான குட்டிக்கதை அடங்கிய மிச்சத்தை, தமிழ் பேப்பரில் வெளியாகியுள்ள என் கட்டுரையில் படித்துக்கொள்ளுங்கள்.

கீழேயும் மீள்பதிவாக இக்கட்டுரையை கொடுத்துள்ளேன்.

Continue reading

2010 இயற்பியல் நோபல் இங்கிலாந்தின் மான்செஸ்டர் பல்கலைகழகத்தைச் சேர்ந்த ஆண்ட்ரீ கெய்ம் (Andre Geim) மற்றும் கொன்ஸ்டெண்ட்டின் நொவோஸெலெவ் (Konstantin Novoselov) இருவருக்கும் அளிக்கப்பட்டுள்ளது. கிராஃபீன் (Graphene) என்ற பொருளை 2004இல் கண்டுபிடித்ததற்காக இப்பரிசு இவர்களுக்கு அளிக்கப்பட்டுள்ளது. இருபரிமாண கிராஃபீன் பற்றிய “பூமி உடையும் பரிசோதனைகள்” நிகழ்த்தியதற்காக (அதாங்க groundbreaking experiments) இப்பரிசு என்கிறது நோபல் பரிந்துரை.

அப்படி என்ன கிராஃபீனுக்கு திடீர் மவுசு? தமிழ்பேப்பரில் வெளியாகியிருக்கும் என் கட்டுரையில் படித்துப்பாருங்கள். சில வாரங்கள் ஆகிவிட்டபடியால், கீழே  அக்கட்டுரையை மீள்பதிப்பித்திருக்கிறேன்.

கொசுறாக, கிராஃபீன் பற்றி மேலும் அறிந்துகொள்ள கீழே கிராஃபீன் டச் ஸ்க்ரீன், செய்முறை பற்றிய விடியோக்களையும், பல தகவல் சுட்டிகளையும் தருகிறேன்.

Continue reading

லைட் ரீடிங் மட்டும் செய்யும் (இன்றைக்கு) வயதுவந்த அன்பர்களுக்கு குளைச்சல் ஜார்ஜ் ஞாபகம் இருக்கும் (ஞாபகம் வரவில்லையென்றால் எனக்கு மறுவினையுங்கள்). அவர் பாணியில் ஏலியன்ஸ் பற்றி வலையில் பீராய்ந்த விஷயங்களை வைத்து ஒரு சிறு இடைச்சொருகல் செய்வோம். அறிவியலை கட்டுரைகளாகவே எப்போதும் எழுதுவது/படிப்பதிலிருந்து ஒரு மாற்று.

கீழுள்ள ஒவ்வொரு புல்லட்டிலுள்ள வாக்கியத்தை படிக்கும்முன்பு ”உங்களுக்கு தெரியுமா?” என்று வினவிக்கொள்ளுங்கள். (வாக்கியத்தை படித்ததும், மேட்டர் ஏற்கனவே தெரியும் என்றால், ”போடாங்க…” என்றும் சொல்லிக்கொள்ளலாம்)
Continue reading