எரிகற்களை வைத்து செவ்வாயில் உயிர் இருக்கிறதா என்று ஆராய்ந்ததை அடுத்து நேரடியாக செவ்வாய்க்கே சென்று உயிரைத்தேடுவது பற்றி விரித்துரைப்போம். ஏற்கனவே சொன்னதுபோல் ஒரு பல ஆராய்ச்சி இழைகளில் ஒரு நூலைமட்டும் வைத்து இக்கட்டுரையை நெசவுவோம்.

1965இல் ரோந்து வின்கலன் மாரினர் 4, பெர்சிவால் லொவெல் முதலானோர் இருப்பதாய் வலியுறுத்திய (ஏலியபுராணம் கட்டுரையை பார்க்கவும்) கால்வாய்களை இதன் பரப்பில் காணவில்லை. 1971இல் மாரினர் 9 முதன்முதலில் வேற்று (செவ்வாய்) கிரகத்தை சுற்றிய செயற்கைகோளானது. பிறகு 1975இல் நாஸா அனுப்பிய வைக்கிங் 1 மற்றும் 2, 1976இல செவ்வாயில் முதன்முதலில் தரையிறங்கிய விண்கலன்கள். செவ்வாயில் உயிர் இருக்கிறதா என்ற நான்கு பரிசோதனைகளை செய்தவையும் இவ்விண்கலன்களே. பார்க்கப்போனால் இதுவரை வேற்றுகிரகத்தில் உயிர் இருக்கிறதா என்ற கேள்விக்கு பதில் அறிய செய்யப்பட்ட வெற்றிகரமான பரிசோதனை இது மட்டுமே. மற்ற மார்ஸ்-மிஷன்களெல்லாம் நேரடியாக இக்கேள்விக்கு பதில்கண்டுபிடிக்காத மீடியா திரிபு. இந்த சோதனைகள், முடிவுகள், சச்சரவுகள், பற்றி விவரிப்போம்.
Continue reading

செவ்வாயில் உயிர் இருக்கிறதா என்ற ஆராய்ச்சியில், பெர்சிவால் லோவெல் கால்வாய்கள், ஹோக்லாண்ட் செவ்வாய் மனிதமுகம் இப்படி அனுமானங்களையும், போலி அறிவியல்களையும் கடந்து, அறிவியல் ரீதியாய் பரிசோதனைகள் செய்து, செவ்வாயில் நிஜமாகவே உயிர் இருக்கலாமோ என்று விஞ்ஞானிகளை உந்திவிட்ட விஷயம் முதலில் நம் பூமியிலேயே கண்டுபிடிக்கப்பட்டது.

அது ALH84001.

ALH84001. ஆலன் ஹில்ஸ் 84001 இன் சுருக்கம். 84001 என்பது 1984ஆம் வருடத்திய முதல் எரிகல் என்பதின் சுருக்கம். அண்டார்ட்டிக்காவில் டிசெம்பர் 27, 1984இல் விஞ்ஞானிகள் கண்டெடுத்த எரிகல்லின் நாமகரணம். சுமார் 2 கிலோ எடை (பியூரிஸ்டுகளுக்கு 1.933 கிலோகிராம்கள்), ஆர்த்தோபைரோசீனைட் (கல்)ஜாதி, இரண்டு கைக்குள் அடங்கும் உருளைக்கிழங்கு பருமன். சாதா பாறைபோல தோற்றம்.

ஆனால், இது செவ்வாயிலிருந்து பெயர்ந்து, வளியில் எழுந்து, விண்வெளியில் பறந்து, வளியில் விழுந்து, பூமியில் தஞ்சமடைந்துள்ளது.
Continue reading

ஏலியன்களை ஏன் எங்கோ தேடவேண்டும். முதலில் அருகில் தேடிப்பார்க்கலாமே என்று நினைத்தால் தேடவேண்டிய இடங்கள் சில உள்ளன.

முதலில் நம் உலகம். அமேசான் காடு, ஆழ்கடல், இமாலயா, ஈஞ்சம்பாடி என பல இடங்களை, காத்து கருப்பு அடிச்சுருமேன்னு தேடாமல் விட்டுவைத்திருக்கிறோம். அவ்வப்போது பிரடேட்டர் (predator) போன்ற திரைப்படங்கள் எடுத்து இங்கெல்லாம் வேற்றுகிரக ஏலியன்ஸ் உலவலாம் என்று பூச்சாண்டி விடுகிறோம். ஆனாலும் அவகாசமிருக்கையில் ஈஞ்சம்பாடி போன்ற பகுதிகளில், அறிவியலார்த்தமான ஏலியன்ஸ், தொல்பொருள் ஆராய்ச்சி என தேடுதலுக்கு முன்னரே வேலிகட்டி பிளாட்டு போட்டு மனிதர்களை குடியேறிவிடுகிறோம்.
Continue reading

ஏலியபுராணத்தின் முடிவில் செவ்வாய் கிரகம் செல்வதாக இருந்தேன். செவ்வாயினுள் செல்வதற்கு முன் ஒரு ரேடியோ கார்பன் டேட்டிங் போய்வருவோம். இந்த இடைப்பயணத்தை விரும்பாதவர்கள், அடுத்த கட்டுரைக்கு காத்திருங்கள். உங்கள் ஏலியன்ஸ், செவ்வாய் பற்றிய அறிதல் புரிதலுக்கு எந்த பங்கமும் வராது.

கார்பன் டேட்டிங். கார்பனால் செய்யப்பட்ட இருவர், அமேரிக்காவில் ரேடியோ வழியே நிச்சயித்து, காரில் வந்து சந்தித்து, ஒரு பீரியாடிக் டேபிளில் எதிரெதிரே உட்கார்ந்து பன் சாப்பிட்டுக்கொண்டே வம்படிக்க ஒதுக்கும் நேரம்தான் இந்த டேட்டிங்.

பீரியாடிக் டேபிள் என்றால் மூலக்கூறு அட்டவணை. மேற்படி வேடிக்கை விளக்கத்திற்கு ஏற்றவாறு, படத்திலுள்ளபடியும் இருக்கலாம். டேபிள் அமேரிக்காவில், வடக்கு கரோலினா மாநிலத்தில் வேக் ஃபாரஸ்ட் பல்கலைகழகத்தில் வேதியியல் துறை முகப்பில் இருகிறது.

ரேடியோ கார்பன் டேட்டிங் சொற்றொடர் அறிவியலில் வேறு சுவாரசியமான விஷயத்தை விளக்குகிறது. செத்தவைகளுக்கான துல்லியமான தேதியாக்கம்.
Continue reading

CERN ஆராய்ச்சி மையத்தில் சமீபத்தில் விஞ்ஞானிகளை வரைந்து காட்டு என்று ஏழாவது படிக்கும் சிறுவர்களை கேட்டு, அவர்கள் மனதில் தோன்றியதை வைத்து வரைந்ததை வெளியிட்டிருக்கிறார்கள். கூடவே அதே சிறுவர்களை நேரடியாக விஞ்ஞானிகளை பார்க்கவைத்து மீண்டும் வரையச்செய்து அதையும் வெளியிட்டிருக்கிறார்கள்.

இந்த படங்களை பார்த்த எனக்கு உடனே மனதில் பட்டது, நிஜ விஞ்ஞானிகள் இப்போதெல்லாம் மாறுவேடத்தில் உலவுகிறார்கள்.
Continue reading

சிறுவியல் என்பது சிறுவர் அறிவியல் சுருக்கம். சிறு அறிவியல் செய்திகள் என்றும் கொள்ளலாம்.

குளத்தில், குழம்பில், மீன் பார்த்து இருக்கிறோம். நீந்தும் மீன் ஜாலியாக இருக்குமா? தூண்டிலிட்டு நாம் பிடித்துவிட்டால் சோகமாகிவிடுமா? சாப்பிடும்முன் உணவுடன் நான் பேசுவதில்லை. அதனால் எனக்கு தெரியாது.

ஆனால் நிஜமாகவே கடலில் ஒரு சோக மீன் இருக்கிறது.

குழந்தை கையில் காலில் சிக்கி தோலுடன் பிதுக்கிய வாழைப்பழம் போல கொழகொழ என்று இருக்கும். எந்தப் பக்கம் இருந்து பார்த்தாலும் சோகமான மூஞ்சியுடன். Sad fish அல்லது Blob fish என்று ஆங்கிலத்தில் பெயர்.

Continue reading

செட்டி (SETI) என்றால் ஸெர்ச் ஃபார் எக்ஸ்ட்ரா டெரெஸ்டிரியல் இன்டெலிஜென்ஸ். இன்று மனிதனின் பலவிதமான ஏலியன்ஸ் தேடல்களை அவர்களிடம் தொடர்புகொள்ளும் முயற்சிகளை சேர்த்து விளிக்கும் ஒரே வார்த்தை செட்டி . வளி-அறிவு-ஜீவிகள் தேடல். [1 – எதற்கும் கீழே குறிப்பை ஒருமுறை பார்த்துவிட்டு தொடரவும்].

பனிப்போரின் உச்சத்தில் 1960களில் அமெரிக்க ருஷ்ய கைகுலுக்கல்களுடன் நாஸா ஆதரவுடன் ஏக சாத்தியங்களுடன் தொடங்கி, பயோநீர் பட்டயம், வாயேஜர் வட்டு, பீட்டில்ஸ் பாட்டு என்று 1970களில் உற்சாகமாக அங்குமிங்கும் சுற்றி சைக்ளாப்ஸ், மெட்டி என்று 1980களில் அலைபாய்ந்து, டகில்பாய்ந்து, இன்டிரவெலுக்கு பின் தற்போது அரசாங்க ஆதரவற்று அரசிபோ சமிஞ்சை, வீட்டில் செட்டி, என தனிமனிதர்களின் கருணையில் ஜெனரல் வார்ட்டில் பி-பாஸிட்டிவ் ரத்தம் ஏற்றி உயிருடன் இருத்திவைக்கப்பட்டுள்ள ஏலியன்ஸிற்கான நம் ஒரு தலை ராகம்.

டி.ராஜேந்தரின் அடுக்கு வசனங்கள் போல, செட்டி ரசிகர் மனதில் எஞ்சி நிற்பது ஸாகனின் காஸ்மாஸ் தொலைக்காட்சி தொடரும் புதிய-இனம் கான புதினம் படைக்க தாயுலகக்கட்டிலிருந்து விடுபட்டு தாவி நக்ஷத்திரங்களை சுவீகரிக்கும் அறிவியல் எழுச்சிப் பேச்சுகளும்தான்.
Continue reading

நாச்சியார்கோவில், திருச்சேரை பக்கம் வெள்ளிங்கிரி, ரமேஷ்குமார் என்றெல்லாம் பெயர்களோடு பஸ்போகும் ரோட்டோர டீக்கடையில் பார்த்திபனும் வடிவேலுவும், வேண்டாம், யாரோ இருவர் பேசிக்கொண்டிருக்கிறார்கள். ஓசி பேப்பரில் தலையை நுழைத்து சற்று ஒட்டுகேட்போம்.

ஏம்பா ஊர்ல என்ன நடப்பு, பேப்பர்ல நியூஸ் வந்திருக்காம்ல, ஆக்கிங் சொன்னார்னுட்டு. டேய் இருடா, அது ஹாக்கிங்டா. உன் ஊர் நடப்ப  ஹாக்கிங் யோசிக்கராரா.

(வந்துட்டாய்யா, வந்துட்டாய்யா…) ஏம்பா, எங்கிட்டோ உள்ளார ஏலியன்ஸ் பத்தியெல்லாம் கருத்து சொல்லுறாரு, ஒரே உலகத்துல பக்கத்து நாட்டுல இருக்கற என்னயபத்தி தெரிஞ்சு சொல்லமாட்டாரா. டேய், உன்னய தெரிஞ்சுதா சொல்ல ஒண்னுமில்லைன்னு சொல்லல. இப்ப, ஆதவன்ல நெசமான ஹீரோ நீதான்னாகூட எவனும் நம்பமாட்டா இல்லயா…

சரிப்பா கிளராத, அந்தாள் என்னத்தாஞ்சொல்லுரா. அதச்சொல்லு மொதல்ல. அப்துல்கலாமோட முடிகலைஞ்ச லுக்குகூடி இல்ல, பெரிய விஞ்ஞானி கணக்கா நம்ம அல்லாத்துக்கும் பயம் காட்டுராரே. யாரோ ஏலியன்ஸ் வராங்களாமே நம்மள போட்டுதள்ள… நா இங்கன வூட்டுள்ளார தேட்டைய போடுற எலியன்ஸ் ரப்சர சரிகட்டுவேனா, எங்கனையோர்ந்து வந்து ஆட்டைய போடுவானுங்களோன்னு ஏலியன்ஸ் பத்தி…சரி சரி, என்ன டீ கணக்கா இம்புட்டு சூடாயிட்ட, ஆக்கிங்கோ வாக்கிங்கோ அவர உடுப்பா. நீ என்ன சொல்ர, ஏலியன்ஸ் உண்டா இல்லயா?

உண்டுடாங்ங்க…
Continue reading

தாஜ்மஹால் பார்த்திருக்கிறோம். அரிசியில் தாஜ்மஹால் பார்த்திருக்கிறோம். கலைஅரிசி என்று மைக்கேல்மதனகாமராஜனில் கிரேசிமோஹனால் சிலாகிக்கப்பட்ட ஓவியக்கலை. பார்க்க பூதக்கண்ணாடி வேண்டும். அந்த ஓவியங்களையும்விட சிறிதான, நேனோ ஓவியங்கள் பார்த்திருக்கிறீர்களா. ஒரு சாம்பிள் பாருங்கள்.

Continue reading

ஏலியன்ஸ் என்றால் நீ என்ன நினைக்கிறாய் என்று என் ஆறு வயது மகளிடம் கேட்டேன்: ஓ தெரியுமே; (பிறகு எல்லாம் ஆங்கிலத்தில்…) பிளானெட்டில் வசிப்பவர்கள். அப்டினா நாமா என்றவுடன், யோசித்து திருத்தி, இல்லை, மார்ஸிலோ ப்ளூட்டோவிற்கோ வந்துபோவார்கள். ஸ்பேசில் வசிப்பார்கள் அப்பா. ஸ்பேஷ் ஷிப் வைத்திருப்பார்கள்; பீச் (peach), வெளுப்பு என்று நம்மைப்போல் கலரில் இருக்கமாட்டார்கள், நீலம், பச்சை என்று கலரில், ஓவல் மூஞ்சியுடன், குச்சிகால்களுடன், காற்றே இல்லாமல் உயிர் வாழ்வார்கள்… எனக்குப் பரிச்சயமான உலகைவிட்டு, அதேசமயம் மொத்தமாக விடாமல் (விவரணையை மீண்டும் படித்துப்பாருங்கள்) போய்கொண்டே இருக்கிறாள். ஸ்டாப் ஸ்டாப். இரும்மா; புத்தனாம்பட்டியே பார்கலை நீ எங்கு புளூட்டோ வரை சென்று ஏலியன்ஸை பார்த்தாய் என்றேன். ஐய்யோ அப்பா, நான் சொல்வது கால்வின் 

ஹாப்ஸில் வரும் ஏலியன்ஸ். கார்டூன்கள். நிஜத்தில் அவர்கள் கிடையாது. ஓஹோ, அப்ப மற்ற கிரகத்தில் உயிரே கிடையாதா? ஆமாம்பா நம்மமாதிரி கிடையாது. பாக்டீரியா மாதிரி வேணா இருக்கலாம்…

ஏலியன்ஸ் பற்றி நம் அனைவருக்கும் ஒரு மனப்பிம்பம், தியரி, இருக்கிறது.

Continue reading

அமளி எப்போது, எப்படித் தோன்றும்? குழாயினுள் நீரோடுகையில் இந்த கேள்விகளுக்கு விடைகளை புரிந்துகொள்ளுவோம். அதற்கு தேவையான அமளியின் சரித்திரத்தில் பிரசித்திபெற்ற ஒரு பரிசோதனையையும் இங்கு விளக்குவோம்.

ஹேகன் (Hagen) மற்றும் பாஸ்யூஹ் (Poiseuille) 1839, 1840 வருடங்களில் குழாய்களில், லாமினர் ஃப்ளோ, சீரோட்டத்தை சோதனைகூடத்தில் செய்து காட்டினர் என்று முன்னர் பார்த்தோம். இது எந்த மாதிரி தருணங்களில் உருண்டையான குறுக்குவெட்டுடைய குழாய்களில் நிகழும் என்றும் இவர்கள் வகுத்தனர். குழாய் நீரோட்டம் இவ்வகை சீரோட்டத்திலிருந்து எப்படி அமளி ஓட்டமாகும் என்பதை 1883லில் இருந்து 1890வரை செய்த சோதனைகளில் இங்கிலாந்தை சேர்ந்த ஆஸ்போர்ன் ரெனால்ட்ஸ் (Osborne Reynolds) அறுதியிட்டுக்காட்டினார்.

Continue reading

அமளி இயற்கையின் ஆர்ட் பிலிம். அழகிய புதிர். படைத்தவனுக்கும் புரியாதது. சென்ற நூற்றாண்டின் புகழ்பெற்ற விஞ்ஞானிகளான வெர்னர் ஹைசென்பெர்கும் (Werner Heisenberg), ஸர் ஹொரேஸ் லாம்பும் (Sir Horace Lamb) கடவுளிடம் தாங்கள் விடை கேட்கவிரும்பும் கேள்விகளில் திரவங்களின் அமளியை புரிந்துகொள்ள முடியுமா என்பதும் ஒன்று என்று கூறி, அதற்கு விடை ஒருக்கால் கடவுளுக்கு (படைத்தவனுக்கு) தெரிந்திருக்கலாம் என்று கையைவிரித்துள்ளனர். அமளி ஒருவருக்கு மட்டும் மொத்தமாக என்றும் புரியாது. கூட்டாக அறிவியலாலர்களின் புரிதல் முயற்சி பல நூறுவருடங்களுக்கு நடந்துவருகிறது. இப்போதுதான் இன்டெர்வல் தாண்டி வந்துள்ளோம்.

தொடருவதற்குமுன் சில வாசகர்களுடன் கலந்துரையாடியதில், இதுவரை “லைட் ரீடிங்” போல அறிவியலை எழுதிவிட்டு ஏன் தடாலென்று ஆராய்ச்சிவரை சென்று பாடம்போல இக்கட்டுரைத்தொடரை எழுதவேண்டும் என்பதற்கு விளக்கம் தேவை என்று புரிகிறது. சுருக்கமாக தருகிறேன்.
Continue reading

திரவ ஓட்டத்தில் அமளிக்கு காரணம் விஸ்காசிட்டி, அதாவது பாகுநிலையின் வீரியத்தில் உள்ளது என்றும், அமளி ஓட்டம் என்பது பல சைஸ் சுழல்களால் ஆனது என்றும் மூன்றாவது பாகத்தில் பார்த்தோம். பல சைஸ்களில் ஓடும் சுழல்களின் ஊடே திரவ ஓட்டத்தின் இயக்க ஆற்றல் பெரியசுழலில் இருந்து சிறியவைகளுக்கு தொடர்ந்து மாற்றலாகி, இறுதியில் மாலிக்கியூலர் லெவலில் அளக்கமுடியாத வெப்பமாக மாறி விரயமாகிவிடுகிறது. அமளியாக ஓட்டம் இருப்பதற்கு அதனால் நாம் தொடர்ந்து ஆற்றலை ஊட்டிக்கொண்டே இருக்கவேண்டும், குழாயாக இருந்தால், மோட்டார் பம்பின் மூலம்.

சரி, இவ்வாறு தொட்ட இடத்திலெல்லாம் மாறிக்கொண்டே இருக்கும் வேகங்களை கொண்ட அமளிஓட்டத்தை எப்படி அறுதி இடுவது? இந்த வேகங்களை அளக்க முடியாதா? இதை வைத்து அமளி எங்கு எப்படி நிகழும் என்று அறியமுடியாதா? இயற்கையை புரிந்துகொள்ள இயற்பியல் துறையில் பிற இடங்களில் அணுகுவதைபோல கணித-மாதிரிகளை கொண்டு இந்த அமளியை விளக்க, அனுமானிக்க, கட்டுப்படுத்த முடியாதா? அனைத்து கேள்விகளுக்கும் பதில், ஓரளவு முடியும் என்பதே.

இதில் இளக்காரம் இல்லை.
Continue reading

திரவங்கள், பாய்மங்களின் டர்புலன்ஸ் என்றால் இக்கட்டுரைத்தொடரில் அமளி என்று வைத்துள்ளோம். சில உதாரணங்களை ஏற்கனவே பார்த்தோம். லாமினர் அல்லது தகடொத்த ஓட்டம் எனும் திரவங்களின் சீரோட்டத்தில் இருந்து அமளி ஓட்டம் எவ்வகையில் மாறுபடுகிறது என்றும் பார்த்தோம்.தொடர்ச்சியாக, ஏன் அமளி ஓட்டத்தில் வேகம் எங்கு அளந்தாலும் ஒரு நிலையிலில்லாமல், ஏறியிறங்கிக்கொண்டே இருக்கும் என்று யோசிப்போம்.

அதற்கு முன் அமளியின் மற்றொரு தினவாழ்க்கை உதாரணம். ஹேர் டிரையர்.
Continue reading

டர்புலன்ஸ் என்றால் அமளி என்று, பெயர்க்காரணத்தை சென்ற பாகத்தில் கூறி, இவ்வறிமுக கட்டுரையில் வைத்துள்ளோம். அமளியின் உதாரணங்கள் சென்ற பாகத்தில் பார்த்தோம். டர்புலண்ட் ஃப்ளோ என்றால் திரவங்களின் அமளி ஓட்டம். மாறாக சீரோட்டம் அல்லது தகடொத்த திரவங்களின் ஓட்டமும் நிகழும்.

மேலே படத்தில் லியனார்டோ டா வின்சி கவனித்து வரைந்துள்ளது தினவாழ்வில் நாம் குழாயிலோ, கால்வாயிலோ பார்க்கும் தண்ணீரோட்டம்தான். அமளி ஓட்டம்.
Continue reading

டர்புலன்ஸ் என்ற ஆங்கில வார்த்தையை உச்சரித்ததும் மனக்கண்முன் பல குழப்பங்கள் படமாகத் வந்துபோகலாம் – நுரைபொங்கும் காவிரி, அலைமோதும் கடல், சுழன்றடிக்கும் புயல், நிசப்த நட்சத்திர வெடிப்பு, கலர் நொடிக் கனவுகள், வளையல் குலுங்கும் கலிடாஸ்கோப், பனகல் பார்க் டிராஃபிக், தட்டாமாலை இப்படி. டர்புலன்ஸ் என்ற ஆங்கில வார்த்தைக்கு குழப்பம் என்று பொருள்கொள்ளலாம்தானே.

ஆனால் அறிவியலில், குறிப்பாக இயற்பியலின் ஒரு பகுதியாக நாம் வகுத்திருக்கும் திரவ-இயற்பியலில், டர்புலன்ஸ் என்றால் வேறு. சற்று ஆர்கனைஸ்டு குழப்பம்.

இந்த விஷயத்தை பற்றிய ஆராய்ச்சி பல நூற்றாண்டுகளாக இன்றும் தொடருகிறது. இப்பவும் குன்சாகத்தான் புரிகிறது. இந்த தொடர் கட்டுரைகளில் டர்புலன்ஸ் என்றால் விஞ்ஞானிகள் எதைக்குறிப்பிடுகின்றனர், அதன் புதிர்கள் என்ன, அதை ஆராய்வதில் என்ன பலன்கள், இதனால் தமிழ்நாட்டின் தண்ணீர் பிரச்சனை தீருமா என்று சில விஷயங்களை நாம் பகிர்ந்துகொள்வோம்.
Continue reading

கோவில் இல்லாத ஊரில் குடியிருக்க வேண்டாம் என்று நன்மக்கள் கூறுவர். டிப்பார்ட்மெண்டல் ஸ்டோர் இல்லாத ஊரில் எட்டடுக்கு செங்குத்து தெருவில் ஒரு பிளாட்டிலும் குடிபோக வேண்டாம் என்று சமகால பொதுமக்கள் அறிவுருத்துவர். டாஸ்மாக் இல்லாத ஊரில் அருந்தும் பழக்கம் வேண்டாம் (கட்டுப்படியாகாது) என்று குடிமக்கள் சொல்வதாக கேள்வி. சரி மேட்டருக்கு வருவோம்.

புதிதாக கடை போட்டு, அதில் லாபம் கொழிக்க வேண்டும் என்றால், எந்த இடம் தோதாக வரும்? முன்கூட்டியே நிர்ணயிக்கமுடியுமா?

தேசத்திலோ, மாநிலத்திலோ, மக்கள்தொகை அடர்த்தி குறைவாக இருக்கும் பகுதியில் தொடங்கினால் நிச்சயம் எல்லோரும் கடையை உபயோகிப்பர் என்று ஊகிக்கலாம். ஆனால், மக்கள்தொகை அதிகமாக இருக்கும் பகுதியில் தொடங்கினால், தன்னிச்சையாக கடைக்கு ஜனநடமாட்டம் அதிகமாக இருக்கும் என்பதால், லாபம் அதிகம் வருவது நிச்சயம் என்றும் தோன்றுகிறதே. எது சரி?

Continue reading

[அறிவிப்பு: காரைக்குடி அறிவியல் கருத்தரங்கத்திற்கு சமர்ப்பித்த நீட்டிக்கப்பட்ட ஆராய்ச்சியுரைச் சுருக்கம்  இங்கு கொடுத்துள்ளேன். கட்டுரையில் வரும் கலைச்சொற்களும் அதன் ஆங்கில சம வார்த்தைகளும், உரையின் கீழே  கொடுக்கப்பட்டுள்ளது. வாசகர்களின் கருத்துக்களை வரவேற்கிறோம். சமர்ப்பித்த முழுக்கட்டுரையும், செப்டம்பர் கருத்தரங்கிற்கு முன்னால் இங்கு கொடுக்கிறேன்.]

கட்டுரையின் முழுத்தலைப்பு: உயிர்வெப்பவியல் மாதிரியை கொண்டு விழித்திரை லேசர் ரணவைத்திய சிகிச்சையின் கணினி ஒப்பியலாக்கம்
எழுதியவர்: அருண் நரசிம்மன்

Continue reading

மொட்டைத்தலைக்கும் முழங்காலுக்கும் முடிச்சு போட முடியுமோ என்னவோ. ஆனால் ஆறு கட்ட பிரிவு (சிக்ஸ் டிகிரீஸ் ஆஃப் செபரேஷன்) என்ற கருத்தின் படி நம்மூர் அமாவாசைக்கும் அசலூர் அப்துல்காதருக்கும் நிச்சயம் முடிச்சுபோட முடியும். ஆறு கட்ட பிரிவு  கருத்துப்படி பொதுவில் உலகில் உங்களுக்கு தெரிந்தவருக்கு, தெரிந்தவருக்கு, தெரிந்தவருக்கு, தெரிந்தவருக்கு தெரிந்தவருக்கு என்னை தெரிந்திருக்கும்.

முன்பின் சந்தித்திராத உங்களையும் என்னையும் – நாம் உலகில் எந்த இருவராக இருப்பினும் – இணைப்பதற்கு ஆறு பிணைப்புகள் கொண்ட சங்கிலி தொடர் போதும் என்கிறது இக்கருத்து. மனிதர்களை சிறு கோலிகளாக பாவித்து இக்கருத்தை விளக்கும் படத்தை அருகில் பார்க்கவும்.

இஸ்டீவன் மில்கிராம் என்பவர் 1960களில் இந்த கருத்தை உலகம் சுருங்கிகொண்டு வருகிறது என்ற சிந்தையை அடிகோல உபயோகித்தார். நிருபிப்பதற்கு சில பரிசோதனைகளையும் செய்தார். மால்கம் கிளாடுவெல் என்பவர் சமீபத்தில் எழுதி பிரபலமான ’த டிப்பிங் பாயிண்ட்’ என்ற புத்தகத்தில் இந்த சோதனையை விவரிக்கிறார். என்ன என்று பார்ப்போம்.

Continue reading

[அபாய அறிவிப்பு: கட்டுரை சற்று நீண்டுவிட்டது. பாதியில் கொட்டாவி வந்தால், மீண்டும் வந்து, விட்ட இடத்தில் இருந்து மறக்காமல் படித்துமுடித்துவிடுங்கள். இல்லை எரட்டோஸ்த்தனஸும் நியூட்டனும் வருந்துவர். பெரியவர்கள் பொல்லாப்பு சும்மா விடாது. ஜாக்கிரதை.]

டெர்ரி பிராட்ச்செட் படித்திருக்கிறீர்களா? டக்ளஸ் ஆடம்ஸிற்கு (ஹிட்ச்ஹைக்கர்ஸ் கைடு ட்டு த காலக்ஸி எழுதியவர் – படித்ததில்லை என்றால் முதல் காரியமாக வாங்கி இரண்டு நாள் லீவ்போட்டு படித்துவிடுங்கள்) பிறகு தற்போது ஆங்கில ஹாஸ்ய-விஞ்ஞான-விநோத (அம்புலிமாமா) கதைகள் எழுதுவதில் பிரபலமானவர். டெர்ரி பிராட்செட்டின் நாவல்களில் கதைகள் நடப்பது அவரது விநோத உலகில். உருண்டை இல்லை. தட்டையானது. ஆமை முதுகில் சவாரிக்கும் யானைகள் சுமக்கும் டிஸ்க் வேர்ல்ட். இந்த தட்டையுலகின் புவியீர்பின் விநோதங்களில் இருந்து, பல அறிவியல் மற்றும் கலாச்சார விநோதங்களை பல நாவல்களில் ஹாஸ்யத்துடன் ஆராய்கிறார்.

இந்த தட்டை உலகமும் அதன் தொடர்பான கோடிவரை சென்றுவிட்டால் அப்புறம் தொபுகடீர் என்று கீழே விழுந்துவிடுவோமோ (எதில்?) போன்ற பயங்களும் நமக்கு, அதாவது, மனிதகுலத்திற்கு, அவ்வளவு புதிது இல்லை.

Continue reading